खम्हा
थुन्ही
बाती
रूप पतहर के
हमार बाबुजी
रहनी
सगरो आधार
हमरा घर के।
करम करत
असरा के सुग्गा
पोस-पोस
हमार बाबुजी
कान्हे बइठा के प्रतिष्ठा
पैदले चल दीं
कई कोस।
दिन-रात
सम्बन्धन के धोती सँइहारत
ऊँहा के
कई बेर काम चला लीं
चटनी आ रोटी से
आ माथे के पसेना पोंछ
निहाल हो जाईं
साँचो कहत बानी
तबो ऊँहा के
दुःख ना बताईं।
समय से ताल ठोकत
ललकारत समय के
गतिशील रहनी
हम जानत बानी
कि अंत बेरा ले
का-का ना सहनी
ऊँहा के
बिपत के विष
गटइए में रोक लीं
परिवार
रिश्तेदार
पट्टीदार
सबके सुख बदे
कवनो हाल में
समय से
ताल ठोंक लीं
हम ई सोंच के सुख पाइले
कि ऊहें कारने
हमार नाव बा
दुकाहें हमरा लागेला
कि हमरा मुड़ी पर
आजुओ बाबुजी के
असीस के छाँव बा।
..................
- केशव मोहन पाण्डेय
कोई टिप्पणी नहीं:
एक टिप्पणी भेजें